بسته شدن مرز میان افغانستان و تاجیکستان

دولت افغانستان اعلام کرد که مرز مشترک این کشور با تاجیکستان را به دلیل جلوگیری از عبور و مرو شورشیان مسدود ساخته است.

صدیق صدیقی، سخنگوی وزارت کشور افغانستان گفت که این مرز به دلیل راه اندازی عملیات ویژه از سوی تاجیکستان علیه “تروریست‌ها” بسته شده است.

 

وی گفت که بسته شدن مرز دو کشور موقتی است و با ختم این عملیات دوباره بازگشایی خواهد شد.

 

دولت تاجیکستان از روز سه شنبه هفته گذشته با اعزام حدود سه هزار نیرو با تانک و هلی کوپتر عملیاتی را برعلیه گروهی از جنگ جویان که شمار آنان حدود ۲۰۰ نفر است، در منطقه خاروق مرکز ولایت بدخشان آغاز کرده است.

 

این جنگ جویان متهم شده‌اند که عبدالله نظر اف، رئیس امور امنیتی ولایت بدخشان را به قتل رسانده‌اند.

 

ولایت بدخشان تاجیکستان با ولایت بدخشان افغانستان هم مرز است. تاجیکستان حدود ۱۳۰۰ کیلومتر مرز مشترک با افغانستان دارد.

 

این مرز طولانی ازمحورهای اصلی قاچاق مواد مخدر از افغانستان به تاجیکستان، روسیه و غرب به شمار می‌رود و هر از گاهی است دست خوش نا‌امنی می‌شود.

 

بخشی از تدارکات نیروهای ناتو در افغانستان از طریق تاجیکستان انجام می‌شود. خشنود رحت الله اف، از مسئولین مرزبانی تاجیکستان گفته است با وجود بسته شدن مرز، تدارکات ناتو مستثنا است و در رفت و آمد کاروان‌های ناتو محدودیتی اعمال نخواهد شد.